विश्वकप २०२६ : मोरक्कोसँग ब्राजिल बराबरीमा, टर्कीमाथि अस्ट्रेलियाको जित
समाचारदाता : गोपाल पौडेल
२०८३ जेठ ३१ गते।
धराने मिडिया : फिफा विश्वकप २०२६ को समूह चरणअन्तर्गत शनिबार सम्पन्न खेलहरूमा ब्राजिलले मोरक्कोसँग १–१ को बराबरी खेलेको छ भने अस्ट्रेलियाले टर्कीलाई २–० ले पराजित गर्दै विजयी सुरुआत गरेको छ।
ब्राजिल १–१ मोरक्को
समूह ‘सी’ को बहुप्रतीक्षित खेलमा मोरक्कोले सुरुआती समयमै आक्रामक प्रदर्शन गर्दै अग्रता बनाएको थियो। इस्माइल सैबारीको गोलमार्फत मोरक्को अघि बढे पनि ब्राजिलका स्टार फरवार्ड भिनिसियस जुनियरले उत्कृष्ट गोल गर्दै खेल बराबरीमा ल्याए। त्यसपछि दुवै टोलीले थप अवसर सिर्जना गरे पनि निर्णायक गोल ननिस्कँदा अंक बाँड्न बाध्य भए। यो नतिजाले समूह ‘सी’ को प्रतिस्पर्धालाई थप रोमाञ्चक बनाएको छ।
अस्ट्रेलिया २–० टर्की
समूह ‘डी’ अन्तर्गतको खेलमा अस्ट्रेलियाले सशक्त र संगठित प्रदर्शन गर्दै टर्कीलाई २–० ले हरायो। नेस्टोरी इरानकुन्डाले पहिलो गोल गर्दै टोलीलाई अग्रता दिलाए भने दोस्रो हाफमा कोनर मेटकाफले अर्को गोल थपे। बलमा टर्कीको पकड बढी रहे पनि अस्ट्रेलियाको अनुशासित रक्षापंक्तिले विपक्षीलाई गोल गर्न दिएन।
ब्राजिलले आफ्नो अर्को समूह खेलमा हैटीसँग प्रतिस्पर्धा गर्नेछ भने मोरक्कोले अर्को खेलमा स्कटल्यान्डको सामना गर्नेछ।
विश्वकपका अर्को निर्धारित खेलहरू (नेपाल समय) यसप्रकार छन्:
जर्मनी vs कुरासाओ – राति १०:४५ बजे
नेदरल्यान्ड्स vs जापान – राति १:४५ बजे
आइभोरी कोस्ट vs इक्वेडर – बिहान ४:४५ बजे
स्विडेन vs ट्युनिसिया – बिहान ७:४५ बजे
विश्व फुटबलको सबैभन्दा प्रतिष्ठित प्रतियोगिता विश्वकप २०२६ यसपटक आकार, स्वरूप र सहभागिताका हिसाबले इतिहासकै विशेष संस्करण बनेको छ। क्यानडा, मेक्सिको र संयुक्त राज्य अमेरिकाले संयुक्त रूपमा आयोजना गरिरहेको यो प्रतियोगिताले नयाँ कीर्तिमानहरू कायम गरेको छ।
सन् १९९८ देखि २०२२ सम्म विश्वकपमा ३२ टोलीले प्रतिस्पर्धा गर्दै आएका थिए। तर २०२६ संस्करणमा पहिलो पटक ४८ राष्ट्रिय टोली सहभागी भएका छन्, जसले प्रतियोगितालाई अझ समावेशी र प्रतिस्पर्धात्मक बनाएको छ। त्यस्तै यो विश्वकप क्यानडा, मेक्सिको र संयुक्त राज्य अमेरिकाले संयुक्त रूपमा आयोजना गरिरहेका छन्। तीन राष्ट्रले मिलेर आयोजना गरेको यो पुरुष विश्वकप इतिहासकै पहिलो संस्करण हो।
प्रतियोगितामा टोली संख्या बढेपछि खेल संख्या पनि उल्लेखनीय रूपमा बढेको छ। यस संस्करणमा कुल १०४ खेल खेलिनेछन्, जुन अघिल्लो ६४ खेलको ढाँचाभन्दा धेरै हो। नयाँ ढाँचाअनुसार च्याम्पियन बन्ने टोलीले समूह चरण र नकआउटसहित अधिकतम आठ खेल खेल्नुपर्ने हुन्छ। यसअघि उपाधि जित्न सात खेल पर्याप्त हुन्थ्यो।
