तीन दिने समाचार लेखन तथा आचारसंहिता सम्बन्धी तालिम विराटनगरमा सुरु
समाचारदाता : गोपाल पौडेल
विराटनगर, २०८३ जेठ २२ गते।
धराने मिडिया : पत्रकारिताको गुणस्तर अभिवृद्धि तथा सञ्चारकर्मीहरूलाई व्यावसायिक रूपमा थप दक्ष बनाउने उद्देश्यले आयोजना गरिएको तीन दिने “समाचार लेखन तथा आचारसंहिता सम्बन्धी तालिम” बिहीबारदेखि विराटनगरमा सुरु भएको छ।
नेपाल पत्रकार महासंघ कोशी प्रदेशको आयोजनामा सञ्चालन भएको उक्त तालिम जेठ २२, २३ र २४ गतेसम्म विराटनगरस्थित बरगाछीको होटल रुबिजमा सञ्चालन हुनेछ। कोशी प्रदेशका विभिन्न जिल्लाबाट सहभागी पत्रकारहरूको उपस्थितिमा सुरु भएको तालिममा समाचार लेखनका सिद्धान्त, व्यावहारिक सीप, पत्रकार आचारसंहिता तथा समसामयिक सञ्चार चुनौतीका विषयमा प्रशिक्षण प्रदान गरिने आयोजकले जनाएको छ।
कार्यक्रमको उद्घाटन नेपाल पत्रकार महासंघ कोशी प्रदेशका उपाध्यक्ष कुवत अधिकारीको स्वागत मन्तव्यबाट भएको थियो। स्वागत मन्तव्यका क्रममा उनले पत्रकारिता क्षेत्रमा बढ्दो प्रतिस्पर्धा र सूचना प्रविधिको विकाससँगै पत्रकारहरूलाई निरन्तर क्षमता अभिवृद्धि आवश्यक रहेको बताए। उनले यस्ता तालिमले पत्रकारहरूको व्यावसायिक दक्षता बढाउन महत्वपूर्ण योगदान पुग्ने विश्वास व्यक्त गरे।
विश्व वातावरण दिवसको अवसर पारेर आयोजित उद्घाटन समारोहमा प्रमुख अतिथि विराटनगर महानगरपालिकाका प्रमुख नागेश कोइरालाले बिरुवामा पानी हालेर कार्यक्रमको औपचारिक शुभारम्भ गरेका थिए। वातावरण संरक्षणप्रतिको जिम्मेवारीलाई व्यवहारमा उतार्नुपर्ने सन्देश दिन यस्तो प्रतीकात्मक कार्य गरिएको उनले बताए।
उद्घाटन समारोहलाई सम्बोधन गर्दै प्रमुख अतिथि कोइरालाले समाजलाई सही दिशा दिन तथ्यमा आधारित समाचारको भूमिका महत्वपूर्ण हुने उल्लेख गरे। उनले पछिल्लो समय तथ्य र समाचारभन्दा ‘भ्युज’ तथा व्यक्तिगत धारणा बढी चर्चामा आउने प्रवृत्ति बढिरहेको भन्दै पत्रकारहरूले सत्य, निष्पक्ष र प्रमाणमा आधारित समाचार सम्प्रेषणमा विशेष ध्यान दिनुपर्ने बताए।
“पत्रकारको जिम्मेवारी अत्यन्त ठूलो हुन्छ। समाजमा सही सूचना प्रवाह गरेर जनचेतना अभिवृद्धि गर्नु पत्रकारिताको मूल धर्म हो,” उनले भने, “समाचारभन्दा भ्युज हावी हुने प्रवृत्तिले पत्रकारिताको विश्वसनीयतामा असर पुर्याउन सक्छ, त्यसतर्फ सबै सचेत हुन आवश्यक छ।”
कार्यक्रममा सरकारले हालै ल्याएको पत्रकारिता सम्बन्धी नयाँ नीति र त्यसका प्रभावबारे समेत छलफल गरिएको थियो। सहभागी पत्रकारहरूले नीति कार्यान्वयनका सम्भावित पक्ष, चुनौती तथा अवसरबारे आफ्ना धारणा राखेका थिए।
तालिमका क्रममा समाचार लेखनका आधारभूत सिद्धान्त, समाचारको संरचना, स्रोतको प्रयोग, तथ्य परीक्षण, डिजिटल पत्रकारिता, पत्रकार आचारसंहिता तथा जिम्मेवार सञ्चार अभ्यासका विषयमा प्रशिक्षण प्रदान गरिने जनाइएको छ। यस्ता तालिमले पत्रकारहरूमा समाचार सम्पादन तथा लेखन सीप विकास हुनुका साथै आचारसंहिताप्रति थप सचेतना बढाउने अपेक्षा गरिएको छ।
कार्यक्रमका सभापति तथा नेपाल पत्रकार महासंघ कोशी प्रदेशका अध्यक्ष भरत खड्काले शुभकामना मन्तव्य व्यक्त गर्दै पत्रकारिताको विश्वसनीयता कायम राख्न आचारसंहिताको पूर्ण पालना अपरिहार्य रहेको बताए। उनले पत्रकारहरूलाई व्यावसायिक मर्यादा, निष्पक्षता र जिम्मेवारीबोधका साथ समाचार सम्प्रेषण गर्न सुझाव दिए।
अध्यक्ष खड्काले यस्ता तालिमले पत्रकारहरूको क्षमता अभिवृद्धि गर्नुका साथै सञ्चार क्षेत्रलाई थप जिम्मेवार, उत्तरदायी र व्यावसायिक बनाउन सहयोग पुग्ने विश्वास व्यक्त गरे।
शुभकामना मन्तव्य तथा उद्घाटन सत्रका औपचारिक कार्यक्रम सम्पन्न भएसँगै तीन दिने समाचार लेखन तथा आचारसंहिता सम्बन्धी तालिमको उद्घाटन कार्यक्रम समापन भएको थियो।
