आयोजक धरान पहिलो चरणबाट बाहिरियो
समाचारदाता : गोपाल पौडेल
२०८१ माघ २१ गते ।
धराने मिडिया : पाहुना टोली युनाइटेड कर्साङ फुटबल क्लब भारतसँग सडन डेथमा पराजित हुदै आयोजक धरान फुटबल क्लब २५ औं बुढासुब्बा गोल्डकपबाट बाहिरिएको छ ।
खेल शुरु भएको १७ औ मिनेटमा खार्साङका खेलाडी खेमराज भुजेलले वीरन प्रधानको पासमा एक गोल गर्दै आफ्ना् टिमको खाता खोलेका थिए । त्यस्तै गरि खेलको ४४ औं मिनेटमा धरानका बिनोद राईले गोल गर्दै टिमलाई १–१ गोलको बराबरीमा पुर्याएका थिए ।
दोस्रो हाफमा दुवैतर्फबाट गोल गर्ने प्रयास गरेपनि सफल नभएपछि खेल टाइब्रेकरमा धकेलिएको थियो ।
टाइब्रेकर पनि ५–५ गोलको बराबरी भएपछि खेलको निर्णय सडनडेथमा पुगेको थियो । धरान फुटबल क्लबका मनोज राईको प्रहार पोष्ट माथीबाट बाहिरिएपछि युकेएफसी बुढासुब्बा गोल्डकपको सेमिफाइनलमा प्रवेश गरेको हो ।
सोमबारको तेस्रो क्वाटरफाइनल खेल राजा क्लब इटहरी र पाहुना टोली आरटिसी एफसीबिच हुने आयोजक धरान फुटबल क्लबले जनाएको छ।
माघ २६ गतेसम्म सन्चालन हुने प्रतियोगिताको विजेताले ट्रफीसहित नगद १० लाख र उपविजेताले नगद ५ लाख पुरस्कार पाउने आयोजकले जनाएको छ।
