१५ नं. वडा उपाधि नजिक, ५ नं. बाहिरीयो
समाचारदाता : गोपाल पौडेल
२०८१ चैत्र १९ गते ।
धराने मिडिया : २५ औं संस्करणको टेष्टी टेष्टी गोधुली रनिङ कप फुटबल प्रतियोगितामा १५ नं. वडा उपाधि नजिक पुगेको छ ।
सोमबार बेलुकी धरान रंगशालामा भएको पहिलो सेमिफाइनल खेलमा ५ नं. वडालाई टाइब्रेकरमा ४–२ गोल अन्तरले पराजित गर्दै १५ नं. वडा फाइनलमा प्रवेश गरेको हो ।
निर्धारित समयमा गोर रहित बराबरी भएपछि खेल टाइब्रेकरमा पुगेको थियो ।
टाइब्रेकरमा ५ नं. वडाका टेकराज लिम्बू र बिपुल मगर गोल गर्न चुकेपछि १५ नं. वडा विजयी भएको हो । १५ नं. वडाकालागी एरिक गुरुङ, मदन लाबुङ, आशुतोष राई र नगेन राईले गोल गरे ।
५ नं. वडाका अमित विक र मन्दिप राईले मात्रै गोल गरे भने टेकराज लिम्बूको प्रहार बारमा लागेर फर्किएको थियो भने बिपुल मगरको प्रहार आकाशिएको थियो ।
निर्धारित समयमा उत्कृष्ट खेलेको ५ नं. वडाले स्कोर भने गर्न सकेन । ५ नं. वडाको आधा दर्जन फ्रिकिकको १५ नं. वडाका गोल किपर प्रविण लिम्बूले उत्कृष्ट बचाउ गरेका थिए ।
खेलको म्यान अफ द म्याच १५ नं. वडाका सुगम जिमी घोषित भए । उनलाई नगद २ हजार पुरस्कार प्रदान गरिएको थियो ।
फाइनलमा पुगेको १५ नं. वडाले प्रि क्वाटर खेलमा ८ नं. वडा र क्वाटर फाइनलमा १३ नं. वडालाई पराजित गरेर सेमिफाइनलको यात्रा तय गरेको थियो ।
त्यस्तै ५ नं. वडाले प्रि क्वाटरमा १६ र क्वाटर फाइनलमा ११ नं. वडालाई पराजित गर्दै सेमिफाइनलको यात्रा तय गरेको थियो ।
साझ ७ बजे वडा नं. १७ र वडा नं. १४ बीच सेमिफाइनल खेल हुने आयोजकले जानकारी दिएको छ ।
चैत्र २१ गतेसम्म सञ्चालन हुने प्रतियोगितामा धरानका १८ वटा वडा सहभागी छन् । प्रतियोगिताको विजेताले १ लाख ५० हजार र उप विजेताले ७५ हजार नगद पुरस्कार प्राप्त गर्नेछन् भने प्रतियोगिताको क्वाटर फाइलनमा पुगेको टिमले स्व. सुवास राई स्मृति सुपर ८ प्रतियोगितामा सहभागी हुने अवसर प्राप्त गर्ने आयोजक गोधुली क्लबका उपाध्यक्ष सतिस केसीले जानकारी दिए ।
