धरानमा २०५८ सालमा स्थापित डि.आइ.जि.पि कप पुनः सुचारु
समाचारदाता : गोपाल पौडेल
२०८२ मङ्सिर ०९ गते ।
धराने मिडिया : धरानमा २०५८ सालमा स्थापित विद्यार्थी फुटबल प्रतियोगिता डि.आइ.जि.पि कप पुनः सुचारु हुने भएको छ।
नेपाल प्रहरी विद्यालय धरानको आयोजनामा हुँदै आएको कोशी प्रदेश अन्तर विद्यालय डि.आइ.जी.पि कप फुटबल प्रतियोगिताको सातौँ संस्करण पुस ९ देखि १९ सम्म सञ्चालन हुने भएको हो।
प्रतियोगिता संयोजक प्रहरी निरिक्षक सुरेश कुमार हायुले राजनीतिक उतार–चढावका कारण छैटौँ संस्करणपछि रोकिएको डि.आइ.जी.पि कप पुनः सुरु गर्न लागिएको बताउनु भएको छ।
संयोजक हायुले विजेता बिद्यालयलाई रु. ८१,००५ राशीको पुरस्कार र उपविजेतालाई रु. ४१,००५ सहित आकर्षक ट्रफि, मेडल र प्रमाणपत्र प्रदान गरिने बताए ।
त्यस्तै उनले प्रत्येक खेलको ‘म्यान अफ द म्याच’लाई रु.१००५ नगद पुरस्कार र प्रमाणपत्रद्वारा सम्मान गरिने जानकारी दिएका छन।
प्रतियोगितामा उत्कृष्ट खेलाडीहरू गोलकिपर, मिडफिल्डर, डिफेन्डर, हाई स्कोरर, राइजिङ प्लेयर र बेस्ट कोचलाई जनही रु.२००५ प्रदान गरिनेछ भने पुरस्कृत खेलाडीहरु प्रहरी बिद्यालय पढ्न आएमा कक्षा ११ मा ५० प्रतिशत छात्रवृत्ति प्रदान गरिने जानकारी दिए।
डि.आइ.जी.पि कप २०५८ सालदेखि प्रारम्भ भएर २०६३ सालमा बन्द भएको थियो । प्रतियोगिताको छैटौं संस्करणसम्म धरानको डिपोट स्कुलले चार पटक विजेता हुन सफल भएको छ।
