धरान : करोडौंको लागतमा निर्माण भएको कोकाह खानेपानीको पाइपमा डढेलो लागेर क्षति पुगेको छ । सोमबार दिउँसो र राती बराहक्षेत्रको पहाडी क्षेत्रको जंगलमा लागेको डढेलोले पाइपमा क्षति पुगेको हो ।
डढेलो लागेर पाइपमा क्षति पुगेको जानकारी पाएपछि बिहानै खानेपानी बोर्डको कार्यकारी निर्देशक राजु पोख्रेलसहित टोली मर्मतमा गएका थिए ।
अर्को स्थानमा डढेलो लागेको खबर आएपछि मेयर हर्क राज राई बाघ खोला क्षेत्रमा पुगेका थिए ।
राती पुनः बराहक्षेत्र १ को जंगलमा डढेलो लागेको जानकारी पाएपछि नगर प्रहरीसहितको टोली आगो निभाउन पुगेको थियो ।
मेयर राईका अनुसार क्षति पुगेको पाइप मर्मत गर्न खानेपानी बोर्डका कर्मचारी र श्रमदाताको टोली बाघ खोला क्षेत्र जानेछ ।
खानेपानी बोर्डका कार्यकारी निर्देशक राजु पोख्रेलका अनुसार डढेलोले पाइपमा क्षति पुगेपछि कोकाहको पानी आपूर्ति रोकिएको छ ।
कोकाहको पानी वडा नं १७ र ११ का जनताले पिउदै आएका थिए । उनका अनुसार चौबिस घण्टामा ७ लाख लिटर पानी आपूर्ति हुने गरेको थियो ।
