_1749706564.jpeg)
इचिङ्सा लिम्बु मेरो डान्स युनिभर्सको उत्कृष्ट ९ मा
समाचारदाता : गोपाल पौडेल
२०८२ साउन ०६ गते ।
धराने मिडिया : धरानकी उदयीमान नृत्य कलाकार इचिङ्सा लिम्बु मेरो डान्स युनिभर्स नामक अन्तर्राष्ट्रिय नृत्य प्रतियोगिताको उत्कृष्ट ९ मा स्थान बनाउन सफल भएकी छन्।
सोमबार सम्पन्न कार्यक्रममा उत्कृष्ट प्रस्तुति दिँदै उनी उत्कृष्ट ९ मा प्रवेश गर्न सफल भएकी हुन्। अघिल्लो राउण्डबाट भोटिङ राउण्ड सुरु भएको उक्त प्रतियोगितामा भोट र निर्णायकको मूल्याङ्कनका आधारमा उनी यो राउण्डमा सुरक्षित बनेकी हुन्।
उत्कृष्ट ९ का लागि दिइएको प्रस्तुतिमा उनले ५६६ अंक प्राप्त गरेकी छन्, जसले आगामी चरणमा अगाडि बढ्नका लागि सहयोग पुर्याउनेछ। उक्त प्रस्तुतिमा प्राप्त जजको अंक र भोटको आधारमा उनी उत्कृष्ट ८ मा सुरक्षित छिन् वा छैनन् भन्ने निर्णय हुनेछ।
झापाको बिर्तामोडमा सम्पन्न अडिसनबाट छानिएर प्रतियोगिताको यात्रामा अगाडि बढेकी इचिङ्साले विभिन्न शैलीका नृत्य प्रस्तुत गर्दै निर्णायकहरूको मन जित्दै आएकी छन्। उत्कृष्ट १३ बाट सुरु भएको भोटिङ प्रक्रियामा उल्लेखनीय मत प्राप्त गर्दै उनी अहिले उत्कृष्ट ९ मा पुगेकी हुन्।
उक्त प्रतियोगिता हाल काठमाडौंमा भइरहेको छ। प्रतियोगितामा २५ भन्दा बढी देशका हजारौं प्रतिस्पर्धी सहभागी छन्। ती सबै प्रतिस्पर्धीहरूलाई पछि पार्दै इचिङ्सा उत्कृष्ट ९ मा पुग्न सफल भएकी हुन्।
धरानबाट प्रतिनिधित्व गरिरहेकी उनले उत्कृष्ट प्रदर्शन गरिरहेकी छन्।
‘मेरो डान्स युनिभर्स’ इन्ट्रा-नेसनल वेल्फेयर एण्ड सपोर्ट फाउण्डेसन अफ अमेरिकाको आयोजनामा भईरहेको हो। प्रतियोगिताका विजेताले १ करोड रुपैयाँ पुरस्कार जित्नेछन् भने दोस्रो स्थान हासिल गर्नेले ७५ लाख र तेस्रो हुनेले ५० लाख रुपैयाँ प्राप्त गर्नेछन्। धरानको प्रतिनिधित्व गर्दै अन्तर्राष्ट्रिय स्तरमा नेपालको नाम चम्काइरहेकी इचिङ्सालाई भोट दिन मोबाइलमा माई इन्ट्राफाउण्डेसन एप डाउनलोड गर्नुपर्छ। उक्त एप डाउनलोड गरेर भोट दिन सकिन्छ भने, सिम मार्फत भोट दिनको लागि एमडीयु ०३ लेखी उक्त सन्देशलाई ३७००० मा पठाएर भोट सकिने छ ।
