विजयपुर कलेजको तिन दशक लामो इतिहास, प्रधानाध्यापकद्वारा धरानलाई शैक्षिक हब बनाउन सुझाव
समाचारदाता : गोपाल पौडेल
२०८३ जेठ १३ गते।
धराने मिडिया : धरानस्थित विजयपुर माध्यमिक विद्यालय ले तीन दशकभन्दा लामो शैक्षिक यात्रा पार गर्दै पूर्वी नेपालको महत्वपूर्ण शैक्षिक संस्थाको रूपमा आफ्नो पहिचान बनाएको छ। वि.सं. २०४३ साल (१९८६ ई.) मा स्थापना भएको यो संस्था हाल विज्ञान, व्यवस्थापन, मानविकी, कम्प्युटर साइन्स तथा होटल म्यानेजमेन्ट लगायतका कार्यक्रम सञ्चालन गर्दै आएको छ।
विद्यालयका प्रधानाध्यापक निमा भुटियाले धरानलाई “शैक्षिक हब” बनाउन स्थानीय सरकार, निजी तथा सामुदायिक शैक्षिक संस्थाहरूबीच सहकार्य आवश्यक रहेको बताएका छन्। उनले गुणस्तरीय शिक्षा, प्रविधिमैत्री कक्षा, अनुसन्धानमुखी सिकाइ र विद्यार्थीमैत्री वातावरणमार्फत धरानलाई देशकै उत्कृष्ट अध्ययन गन्तव्य बनाउन सकिने धारणा राखेका छन्।
विजयपुर कलेजले स्थापनाकालदेखि नै अनुशासन, नतिजा र अतिरिक्त क्रियाकलापमा विशेष ध्यान दिँदै आएको छ। विद्यालयमा आधुनिक प्रयोगशाला, पुस्तकालय, छात्रावास तथा छात्रवृत्ति सुविधा समेत उपलब्ध रहेको बताइएको छ।
प्रधानाध्यापक भुटियाका अनुसार पछिल्लो समय धरानमा विभिन्न शैक्षिक संस्था विस्तार भइरहेका छन्, जसले धरानलाई पूर्वकै शैक्षिक केन्द्रका रूपमा स्थापित गर्न मद्दत पुगेको छ। उनले विद्यार्थी पलायन रोक्न स्थानीय स्तरमै गुणस्तरीय उच्च शिक्षा आवश्यक रहेको उल्लेख गरे।
_1778906022.jpg)
